After Header

“نحبك”….

0 145

“نحبك”….

نحب نقول…….   وما انجمشي

“نحبك”… صارت..  ما تعبرشي

وحتى ” نموت عليك”.. كلاااااام

و ” توحشتك“… ما اطمنشي

نلوج..  في حبي..  على لوغة

لا رهدانة..  لا ممضوغة

تخرج باحساسي..  مصبوغة

لا تشري الذمة..  لا ترشي

كلمة.. نقول..  نعبر بيها

ومعانيها..  منها فيها

لا انداست..  لا لعبو بيها

ولا تعرضت..  سلعة في مارشي

نلوج..  في كلمة..  الي تقلك

وتفسرلك..  وتعبرلك

كلمة..  بالحق توصلك

معنى احساسي..  وما تظلمشي

كلمة..  رموز..  حروف وشفرة

من ريحة بكري…  يااااا حسرة

أيام..  الولفة..  والعشرة

لا تبيع معاها..  ولا تشري

اليوم .. “نحبك”..  تبكي عيها

آش هانت..  واش لعبو بيها

أميرة..  وراحو إماليها

كفلها زمان..  الما يرحمشي

صار “نحبك”… فردة..  وشركة

واش تدفع..  في سوق البركة

وفات فلوسك؟..  فيه البركة

إنسى “نحبك”.. ديمة تمشي

“نحبك”.. دخلت سوق البورص

و -زوايل- في ملعب..  كورس

…لا تتعنتر..  لا تتفورص..

إنت..  وحظك..  ما تحكمشي

نحب نقول…….   وما انجمشي

“نحبك”… صارت..  ما تعبرشي

وحتى ” نموت عليك”.. كلاااااام

و ” توحشتك”… ما اطمنشي

إنسى..  “نحبك”……

إنسى..  “نحبك”……….

إنسى..  “نحبك”…..    

ديمة تمشي.

 

        الشاعر : جلال الصويدي

للاطلاع على المزيد من الابداعات الثقافية زر موقع ثقافتنا

اترك رد

لن يتم نشر عنوان بريدك الإلكتروني.